Ali Ahmeti, lideri i Partisë Demokratike Shqiptare, ka shprehur kritika të ashpra ndaj kryeministrit të Kosovës, Albin Kurti, pas deklaratës së tij më 18 nëntor 2024, ku ai tha se gjuha shqipe nuk ka qenë kurrë gjuhë zyrtare në Maqedoninë e Veriut. Ahmeti e ka cilësuar këtë deklaratë si të turpshme dhe ka shprehur shqetësimin e tij të thellë, duke theksuar se ajo ka shkaktuar lëndim të thellë te ish-ushtarët e Ushtrisë Çlirimtare Kombëtare (UÇK). Ai ka shpjeguar se kjo deklaratë ka ndikuar negativisht mbi mijëra ushtarë të UÇK-së, duke përmendur se “kjo më ka vrarë shpirtërisht. Kjo ka vrarë shpirtërisht çdo ushtar të UÇK-së, edhe pjesëtarët që i ka në Kosovë; mbi tre mijë ushtarë ka UÇK-ja në Kosovë”.
Ahmeti ka folur për momente të prekshme, duke përmendur nënën e dëshmorit Afrim Kalanica, të cilën e kishte takuar pranë varrit të të birit në Sllupçan. Ai e lidh këtë sakrificë me deklaratën e Kurtit, duke pyetur për çfarë u sakrifikuan ata djem që dhanë jetën për lirinë e shqiptarëve. “Kur nëna e Afrim Kalanicës m’u kujtua ulë te varri që është tek dëshmorët e Sllupçanit”, ka deklaruar ai.
Përveç kritikave të tij, Ahmeti ka theksuar se deklarata e Kurtit është përdorur si argument në mediat maqedonase për të sfiduar statusin zyrtar të gjuhës shqipe. Ai ka bërë thirrje për sqarime nga kryeministri Kurti, duke theksuar se ka kërkuar tri herë publikisht një përgjigje, por pa pasur asnjë reagim nga ana e tij. “Del krah Kristijan Mickovskit dhe thotë: gjuha shqipe kurrë s’ka qenë zyrtare. Tri herë kam kërkuar publikisht të prononcohet”, ka theksuar Ahmeti.

