Ballkani Perëndimor ka nevojë për bashkëpunim rajonal, por ky bashkëpunim duhet të ndërtohet mbi parime të barazisë, transparencës dhe pjesëmarrjes së plotë të të gjitha shteteve. Iniciativa si Mini‑Schengeni (2019) dhe transformimi i saj në Open Balkan u promovuan si mekanizma për lehtësimin e qarkullimit të njerëzve dhe mallrave, por mungesa e pjesëmarrjes së Kosovës, Malit të Zi dhe Bosnjës e Hercegovinës tregon dobësi themelore politike dhe institucionale të këtyre projekteve. Integrimi rajonal nuk mund të zëvendësojë mungesën e besimit dhe përfaqësimit të barabartë ndërmjet shteteve.

Një nga projektet konkrete që propozohet për t’i dhënë përmbajtje integrimit të vërtetë është lidhja e përhershme nënujore ndërmjet Vlorës dhe Otrantos, konceptuar jo vetëm si tunel nën Adriatik, por si një korridor strategjik rrugor dhe hekurudhor. Ky korridor do të synonte lidhje nëntokësore për transport rrugor, një tunel hekurudhor, integrim me porte, terminale logjistike dhe lidhje me rrjetet kombëtare dhe evropiane të transportit. Përfitimet e parashikuara përfshijnë qasje më të mirë të Kosovës në tregjet italiane dhe evropiane përmes Shqipërisë, forcim të rolit të Shqipërisë si nyje infrastrukturore dhe zgjërim të mundësive tregtare për vendet e tjera të rajonit.

Lidhja Vlorë–Otranto duhet të vlerësohet në raport me Korridorin VIII, boshtin lindje–perëndim që lidh Adriatikun me Bullgarinë dhe Detin e Zi përmes Shqipërisë dhe Maqedonisë së Veriut; rëndësia e tij u riafirmua në deklaratën e përbashkët të 18 shkurtit 2026 në Tiranë. Realizimi i këtyre projekteve kërkon financim të kombinuar: mekanizma evropianë si Connecting Europe Facility, instrumente të Western Balkans Investment Framework, dhe institucione financiare si Banka Evropiane e Investimeve dhe BERZH, si dhe konkurrencë ndërkombëtare për kontrata teknike dhe financiare. Parimet kryesore duhet të jenë pjesëmarrja gjithëpërfshirëse, respekti i sovranitetit shtetëror, transparenca në investime dhe ndarja e përfitimeve në mënyrë të drejtë, në mënyrë që projekti të mos kthehet në instrument të dominimit politik, por në rrjet zhvillimi për të gjitha vendet e Ballkanit.